नेपाली राजनीतिका शिखर पुरुष, लोकतान्त्रिक आन्दोलनका नायक तथा शान्ति प्रक्रियाका सूत्रधार स्वर्गीय गिरिजाप्रसाद कोइरालाको १०२औँ जन्मजयन्ती राजधानीमा भव्यताका साथ सम्पन्न भएको छ। कार्यक्रमका प्रमुख अतिथि राष्ट्रपति रामचन्द्र पौडेलले कोइरालालाई राष्ट्रको राजनीतिक रुपान्तरणमा अटल नेतृत्वदायी भूमिका निर्वाह गर्ने असल राजनेताको रूपमा स्मरण गर्दै उहाँप्रति श्रद्धाञ्जली अर्पण गर्नुभयो।राष्ट्रपतिले कोइरालाको जीवन दर्शन, अडिग राजनीतिक प्रतिबद्धता र दूरदर्शितालाई वर्तमान पुस्ताका लागि प्रेरणादायक उदाहरणका रूपमा उल्लेख गर्नुभयो। उहाँले भन्नुभयो, “उहाँ क्रान्ति र शान्तिका नेता मात्र होइन, अप्ठ्यारा घडीमा राष्ट्रलाई सम्हाल्ने राजनीतिक सहिष्णुताका प्रतीक पनि हुनुहुन्थ्यो।”
सो अवसरमा नेपाली कांग्रेसका सभापति एवं पूर्वप्रधानमन्त्री शेरबहादुर देउवा, नेकपा (माओवादी केन्द्र) का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’, तथा अन्य उच्चपदस्थ नेताहरूको उपस्थिति रहेको थियो। उनीहरूले पनि गिरिजाप्रसाद कोइरालाको योगदानको उच्च प्रशंसा गर्दै वर्तमान राजनीतिक स्थायित्व र समृद्धिको मार्गमा उहाँले दिएको दिशानिर्देशन आज पनि मार्गदर्शक रहेको बताए। समारोहमा विशिष्ट वक्ताहरूले कोइरालाको बहुआयामिक योगदानलाई स्मरण गर्दै उहाँको विचार, आस्था र संकल्पबाट राष्ट्रले गहिरो प्रेरणा लिएको उल्लेख गरे। कार्यक्रममा सांस्कृतिक प्रस्तुतिसमेत गरिएको थियो।